Posts Tagged ‘blokado’

Armilkolektemuloj

17 Marto 2011

Marde la israelaj mardefendaj fortoj en la Mediteraneo haltigis ŝipon kiu estis transportanta armilojn en Egiption. La celo estis ke la armiloj estus transportotaj pluen en la Gaza-strion de Egiptio tra la tuneloj kiuj estas sub la landlimo inter Egiptio kaj la Gaza-strio. La armiloj devenis de Irano (troviĝis perslingva manlibro inter la armiloj). En la ŝipo troviĝis 50 tunoj da armiloj, interalie kontraŭŝipaj C-704 misiloj kiuj havas atingokapablon de 35 km kaj eksplodpintaĵon de 130 kg. Se tiuj ĉi misiloj estus atingintaj la Gaza-strion kaj la manojn de la teroristoj, ili estus estintaj vera minaco kontraŭ la israela defendokapablo.

Marde egiptaj proparolantoj komunikis ke Egiptio dimanĉe haltigis kvin veturilojn transportantajn armilojn de Sudano. La celo de tiuj ĉi armiloj ankaŭ estis la Gaza-strio kaj la teroristoj tie.

Merkrede la ĉefministro de Israelo, Benjamin Netanjahu, diris: ”Al ĉiuj kiuj pridubis, atakis kaj kritikis Israelon pro la blokado kontraŭ la Gaza-strio, por haltigi kaj traserĉi ŝipojn celantajn la Gaza-strion, jen la plej klara respondo, tie ĉi hodiaŭ en Aŝdodo, kial estas nia devo, ne nur nia rajto, haltigi kaj senarmiligi tiajn ŝipojn.”

Kion ni povas konkludi de la okazaĵoj okazintaj dum la plejlastaj tagoj? Ni povas konkludi ke en Mezoriento troviĝas armilkolektemuloj kaj ke ili precipe celas plifortigi la teroremulojn kiuj furiozas en la Gaza-strio. Ekde la komenco de tiu ĉi jaro estis pli ol 60 raketoj kaj grenadoj pafataj en sudan Israelon. Tio estas preskaŭ po unu tage! En la anglalingva Vikipedio troviĝas listo pri tiuj ĉi raketoj. Ĉi sube troviĝas ligilo al la koncerna paĝo.

Kion ni alie povas konkludi? Ni povas konkludi ke la silentado inter la monda komunumo estas timiga. Oni iel celas paciĝon en Mezoriento, kaj precipe inter Israelo kaj ties najbaroj, sed oni ne reagas kiam Teherano sendas ŝipojn kun armiloj celantaj la Gaza-strion. Oni silentadas kaj entute ne reagas.

Wikipedia: List of Palestinian rocket attacks on Israel, 2011

Pliaj informoj…

…en la angla: http://www.jpost.com/MiddleEast/Article.aspx?id=212317

…en la franca: http://fr.jpost.com/servlet/Satellite?cid=1297325560316&pagename=JFrench%2FJPArticle%2FShowFull

…en la hispana: http://www.aurora-israel.co.il/articulos/israel/Conflicto/35953/

…en la itala: http://www.informazionecorretta.com/main.php?mediaId=8&sez=120&id=38911

Tiu ĉi afiŝo estas publikigita en tri lokoj samtempe:
miajpripensadoj.wordpress.com, Esperanto.com kaj Ipernity.
Listo de ĉiuj artikoloj.

La Gaza-strio 2011

12 Januaro 2011

Kial mi blogas pri Israelo?

10 Novembro 2010

Troviĝas ŝablono ke kiam Israelo sin defendas oni emas kritiki kaj pridubi la landon pri tio. Kompreneble oni rajtas kritiki kaj pridubi Israelon, sed tio devas okazi surbaze de la samaj principoj laŭ kiuj oni kritikas aliajn landojn. Sed tiel ne estas.

Dum la kvin lastaj jaroj estis tri okazaĵoj kiam oni malĝuste kaj maljuste kritikis kaj pridubis Israelon: la milito en Libano en la somero 2006, la milito en la Gaza-strio en la vintro 2008-2009 kaj la okazaĵoj lige kun la ŝiparo al la Gaza-strio en majo ĉi-jare.

En ĉiuj tiuj tri kazoj oni kritikis Israelon interalie pri uzado de misproporcia perforto kaj troigita perforto. Nu, oni rajtas kritiki kaj pridubi la agadojn de Israelo. Tio ne estas problemo tiel longe kiel oni kritikas kaj pridubas Israelon surbaze de la samaj principoj laŭ kiuj oni kritikas aliajn landojn. La problemo tamen estas ke la internacia komunumo, la mondaj estroj kaj politikistoj, ŝajnas esti pli emaj kritiki la defendajn operaciojn de Israelo ol tiujn kiuj atakas kaj minacas Israelon.

En la somero 2006 Israelo ne estis tiu kiu komencis la militon. Ĝin komencis Hizbulaho, kiu estas terororganizaĵo. Ĝi ekpafis raketojn en Israelon. Israelo devis defendi sin – kiel farus ĉiu ajn alia sinrespektanta demokratia lando estante en simila situacio.

En la vintro 2008-2009 Israelo ankaŭ ne komencis la militon. En tiu ĉi kazo Hamaso kaj pluraj aliaj terororganizaĵoj estis pafantaj milojn da raketoj kaj grenadoj en Israelon. Tio estis fakte okazanta dum multaj jaroj. Ankaŭ en tiu ĉi kazo Israelo defendis sin, kiel – denove – ĉiu ajn alia sinrespektanta demokratia lando farus estante en simila situacio.

En majo ĉi-jare ŝajnpacistoj alproksimiĝis al la bordo de la Gaza-strio. Ili intencis trapasi la maran blokadon kiun Israelo starigas. Israelo ne starigas ĝin por turmenti la palestinanojn, sed por malhelpi al la teroristoj tiel ke ili ne povas havigi armilojn. Israelo estas en milito kun Hamaso, kiu estas terororganizaĵo kaj regas la Gaza-strion.

Israelo klopodis konvinki la ŝipestrarojn stiri la ŝipojn al Aŝdod anstataŭ ol al la Gaza-strio. La ŝipestraroj prifajfis tion kaj israelaj soldatoj devis surferdekiĝi por alparoli la ŝipanojn. La “pacistoj” atendis armitaj kun tranĉiloj kaj feraj tuberoj en siaj manoj. Tiuj ĉi armiloj ne sufiĉis, sed ili prenis la pafilojn de la israelaj soldatoj por pafi al la soldatoj. Ĉiuj devus scii kiel tio finiĝis.

En tiu ĉi kazo: kiu defiis la maran blokadon? Kiu estis armita kun tranĉiloj kaj feraj tuberoj en siaj manoj? Kiu prenis la pafilojn de la israelaj soldatoj por pafi kiujn? Kiu atakis, kiu sin defendis?

En ĉiuj tiuj ĉi tri kazoj oni kritikis Israelon interalie pri uzado de misproporcia perforto kaj troigita perforto. Sed kiel farus alia lando kiu estus en simila situacio? Kiel farus lando kiu estus atakata per miloj da raketoj kaj grenadoj? Ĉu vere tiu lando senage spektus kiam raketoj pluvas sur la kapojn de infanoj, gejunuloj, virinoj, viroj kaj gemaljunuloj? Tutcerte ne.

Ĉiu ajn alia lando, estante en simila situacio, estus aganta sammaniere kiel Israelo en tiuj ĉi tri kazoj.

Kompreneble oni devas analizi kaj kritike pripensi la israelajn defendajn agojn. Tio estas tute normale en demokratiaj landoj. Tamen la kritiko kontraŭ Israelo pri uzado de misproporcia perforto kaj troigita perforto estas absurda kiam oni konsideras ke la atakantoj de Israelo ne estis sammaniere kritikataj. Absurde estas ankaŭ ke la mondo nenion diris antaŭ ol Israelo sin defendis. Kie estis la kritikaj voĉoj kiam Hizbulaho provizis sin per raketoj? Kie estis la voĉoj kiam Hamaso faris la samon?

Kiel jam dirite: oni rajtas kritiki ankaŭ Israelon tiel longe kiel oni faras tion surbaze de la samaj principoj laŭ kiuj oni kritikas aliajn landojn. La situacio tamen fariĝas tre absurda kiam oni en tiuj ĉi tri kazoj kritikis Israelon pri uzado de misproporcia perforto kaj troigita perforto, konsiderante ke la atakantoj preparis sin longe antaŭ Israelo sin devis defendi. Krome la raket- kaj grenadatakoj el la Gaza-strio daŭris dum ok jaroj. Israelo estis povanta defendi sin antaŭe, sed klopodis unue solvi la situacion senmilite.

Oni ne ĝuste kaj juste traktas Israelon. Tio estas tute evidente. Post la libana milito en 2006 Hizbulaho denove provizis sin per raketoj kaj disponas hodiaŭ pri dekmiloj da ili. Kie estas la kritikaj voĉoj?

Hizbulaho ne senkaŭze sin provizas per raketoj. La organizaĵo provizas sin per raketoj por ke iun tagon pafi “simiojn kaj porkojn” (tiel ili priskribas judojn) per la raketoj. Kie estas la kritikaj voĉoj?

La tagon kiam tiuj ĉi dekmiloj da raketoj ekpluvas en norda Israelo, la lando devas sin defendi. Samkiel en 2006. Tiam Israelo estis kritikata pro uzado de misproporcia perforto kaj troigita perforto kaj plej verŝajne Israelo estos akuzita sammaniere la tagon kiam Hizbulaho denove ekpafas.

Oni ne ĝuste kaj juste traktas Israelon.

Tial mi blogas pri tiu lando.

Mi ĝis nun aperigis 39 artikolojn. Tiu ĉi artikolo estas la 40-a. Mi faris liston de ĉiuj artikoloj en la blogo de WordPress: miajpripensadoj.wordpress.com/listo-de-ciuj-artikoloj.

Por havigi ian bazan konscion pri la situacio kiu estas inter Israelo kaj ties malamikoj mi rekomendas ekz. la artikolon “Relativa trankvilo – sed ne paco”. Ĝi havas la numeron 32 en la listo.

Bonan legadon al ĉiuj!

Tiu ĉi afiŝo estas publikigita en tri lokoj samtempe:
miajpripensadoj.wordpress.com, Esperanto.com kaj Ipernity.
Listo de ĉiuj artikoloj.

Uzante malveron kiel veron

2 Oktobro 2010

Tiu ĉi teksto klarigas kiel la prezentado de okazaĵoj povas transformiĝi.

Ŝablono: okazaĵo > kion la judoj/Israelo faris > kiel la afero ofte estas prezentata

La judoj bezonas propran landon pro la persekutoj > La judoj aĉetas landpecojn en la regiono kie antikva Izraelo iam troviĝis > “La judoj ŝtelis la landon de la palestinanoj”, “Israelo okupadas Palestinon” (Neniam ekzistis sendependa ŝtato nomata Palestino.)

La najbaroj de Israelo atakas la landon > Palestinanoj fuĝas > “Israelo forpelis la palestinanojn kaj ŝtelis ilian landon” (Normale militoj kaŭzas rifuĝantojn.)

Teroremaj palestinanoj teroras kontraŭ Israelo > Israelo devas detrui bombfarejojn kiuj estas en ordinaraj hejmoj > “Israelo detruas palestinajn domojn”

Teroremaj palestinanoj teroras kontraŭ Israelo > Israelo devas enprizonigi ilin > “Israelo enprizonigas palestinanojn”

Teroremaj palestinanoj teroras kontraŭ Israelo > Israelo devas konstrui sekurecan barilon por protekti siajn civitanojn > “Israelo konstruis muregon”, “Israelo subpremas la palestinanojn”, “Israelo estas apartisma ŝtato”

Teroremuloj en la Gaza-strio pafas raketojn kaj grenadojn en Israelon > Israelo defendas sin kaj mortigas centojn da teroristoj > “Israelo amasbuĉas palestinanojn”, “Israelo estas tro perforta”

Troviĝas raketpafantaj teroremuloj en la Gaza-strio > Israelo starigas blokadon por ke la teroremuloj ne havigu armilojn, provizaĵoj kaj nutraĵoj estas enlasataj > “Israelo subpremas la palestinanojn”, “Israelo enprizonigas la gazaanojn en granda prizono”, “En la Gaza-strio estas homa katastrofo”, “For la blokado!” (Neniam paroloj kiel “for la teroristoj!”)

Tiu ĉi afiŝo estas publikigita en tri lokoj samtempe:
miajpripensadoj.wordpress.com, Esperanto.com kaj Ipernity.
Listo de ĉiuj artikoloj.

Ĉu manko de akvo kaj konstrumaterialoj en la Gaza-strio?

19 Aŭgusto 2010

Vi tutcerte iam aŭdis ke en la Gaza-strio ne troviĝas pura akvo (ĉar la israelanoj konsumas ĉion) kaj ke Israelo ne permesas konstrumaterialojn esti enportataj en la Gaza-strion.

Bonvolu spekti la sekvan filmeton. Temas pri akvoparko kiu malfermiĝis en la Gaza-strio en junio. En la amaskomunikiloj estas dirite ke en la Gaza-strio ne troviĝas pura akvo kaj ke ankaŭ ne troviĝas konstrumaterialoj. Tio kompreneble ne veras. Troviĝas kaj pura akvo (sufiĉe por ĉiuj) kaj ankaŭ konstrumaterialoj. Aŭ kion vi mem vidas en tiu ĉi filmeto?

Fine eta sugesto: la amaskomunikiloj ne rakontas al vi ĉion! Ankaŭ la loĝantaro en la Gaza-strio havas puran akvon! Kaj eĉ propran akvoparkon!

Oni ne volas raporti pri bonaj aferoj rilate la Gaza-strion, ĉar oni volas ŝajnigi ke Israelo fitraktas la palestinanojn. Sed tio ne veras!

Tiu ĉi afiŝo estas publikigita en tri lokoj samtempe:
miajpripensadoj.wordpress.com, Esperanto.com kaj Ipernity.
Listo de ĉiuj artikoloj.

Kvin malveraj asertoj pri la situacio en la Gaza-strio

8 Julio 2010

”La israela blokado de la Gaza-strio estas punado de la palestinanoj”

Miloj da raketoj kaj grenadoj estis pafataj en Israelon fare de terororganizaĵoj en la Gaza-strio. Tiu ĉi terorado celas senkulpajn homojn: infanojn, junulojn, maljunulojn, virojn, judojn kaj arabojn. Israelo ne starigas la blokadon por puni la palestinanojn, sed por malebligi raketerojn kaj grenaderojn enflui en la Gaza-strion. Tial Israelo devas kontroli homojn kaj provizaĵojn trapasantajn la limojn. Egiptio ankaŭ partoprenas en la blokado. La blokado ne celas la palestinanojn, sed la terororganizaĵojn. En la Gaza-strio ekzistas dekduo da ili.

”La israela blokado estas kontraŭleĝa”

Fakto estas ke la blokado ne estas kontraŭleĝa. Laŭ internaciaj leĝoj lando rajtas starigi blokadon se ĝi estas en armita konflikto kun alia partio. En tiu ĉi kazo Israelo estas en armita konflikto kun Hamaso kaj la aliaj terororganizaĵoj agantaj en la Gaza-strio.

”La blokado naskas pli da terorismo”

Terorismo neniam rajtas esti rimedo por atingi politikajn celojn. Terorismo estas malobservado de la homaj rajtoj. Israelo ne kulpas al la situacio de la palestinanoj. Israelo lasis la Gaza-strion en la aŭtuno jaro 2005 por ke la palestinanoj povus starigi propran ŝtaton. Tamen Hamaso kaj aliaj terororganizaĵoj fortiĝis en la Gaza-strio kaj komenciĝis terorado de la loĝantoj en suda Israelo. Israelo multfoje dum la historio intertraktis kun la palestinanoj, sed la palestinaj estroj ĉiufoje malakceptis la pacproponojn. La terorado kontraŭ Israelo ne kreskas pro la blokado, ĉar la teroristoj ne povas havigi armilerojn. Tio estas la intenco de Israelo, kiu defendas la loĝantojn de la lando kontraŭ la terorisma minaco per blokado.

”En la Gaza-strio estas homa katastrofo”

En la Gaza-strio ne estas manko de nutraĵoj aŭ varoj. Israelo permesas homhelpajn organizaĵojn transporti provizaĵojn en la Gaza-strion. Transportadoj okazas ĉiusemajne. Dum la lastaj 18 monatoj pli ol 1 miliono da tunoj de provizaĵoj estis transportataj en la Gaza-strion, kio egalas al preskaŭ po 1 tuno por ĉiu loĝanto en la Gaza-strio.

”La Gaza-strio estas la plej granda malliberejo en la mondo”

Kelkfoje estas asertate ke la Gaza-strio estas unu el la plej dense enloĝataj regionoj en la mondo. Foje eĉ estas asertate ke la Gaza-strio estas la plej granda malliberejo en la mondo. Por kompreni ke tiuj asertoj malveras oni devas kompari kun iom da datumoj. La sekva listo prezentas la nombron de enloĝantoj po kvadrata kilometro:

Helsinko, Finnlando 1345/km2 (mia naskiĝlando)
Stokholmo, Svedio 3318/km2 (la lando kie mi loĝas ekde jaro 2006)
Gaza-strio 4118/km2
Kopenhago, Danio 6016/km2
Singapuro 7022/km2 (urboŝtato)
Ŝanhajo, Ĉinio 7174/km2
Moskvo, Rusio 9722/km2
Tokio, Japanio 14254/km2
Monako 15142/km2 (urboŝtato)
Mumbajo, Barato 22937/km2
Delhio, Barato 29155/km2
Manilo, Filipinoj 43079/km2

Ĉu la Gaza-strio estas unu el la plej dense enloĝataj regionoj en la mondo? Nepre ne!

Tiu ĉi afiŝo estas publikigita en tri lokoj samtempe:
miajpripensadoj.wordpress.com, Esperanto.com kaj Ipernity.
Listo de ĉiuj artikoloj.

Nia strangega mondo

22 Junio 2010

En tiuj tagoj en nia mondo lando planas defii alian landon. Defion farita de lando kontraŭ alia lando oni normale konsideras malbona kaj kondamninda. Tial similaj planoj ĝenerale kaŭzas reagojn en la mondo. Tamen en tiu ĉi kazo neniaj reagoj estiĝas. La mondo silentas. Ŝajnas ke tiu ĉi plano de defio kaŭzas neniajn ajn reagojn en la mondo. Kial? Verŝajne ĉar temas pri Israelo. Libano preparas sendi ŝipon kun helpaĵoj al la Gaza-strio. Ne estas malbone aŭ malpermesite transporti helpaĵojn en la Gaza-strion, sed oni ne povas transporti ilin rekte en la Gaza-strion. Kial? Ĉar tie estas mara blokado. Kial? Ĉar Israelo estas en armita konflikto kun Hamas, kiu estas terorista organizaĵo.

Libano do planas defii Israelon. Defion de lando kontraŭ alia lando oni normale konsideras malbona kaj kondamninda. Tamen en tiu ĉi kazo la mondo silentas. Kial? Verŝajne ĉar temas pri Israelo. Ne estas novaĵo ke oni pritraktas Israelon maljuste kaj alimaniere ol aliajn landojn. Tio vere ne estas novaĵo. Normale la mondo forte reagas se lando planas defii alian landon, sed en tiu ĉi kazo nenio okazas. La mondo silentas kaj Israelo estas lasita sola. Estas severa afero ke lando defias alian landon. Sed en tiu ĉi kazo oni agas kvazaŭ nenio malbona okazas.

Ehud Barak, la israela ministro de defendo, klarigis al la libana registaro ke ĝi havas la respondecon pri la ŝipoj lasantaj la libanajn havenojn, ĉar estas klare ke la ŝipoj intencas defii la maran blokadon. Ehud Barak ankaŭ avertis la libanan registaron kaj klarigis ke ĝi devas malhelpi armilojn veni sur la ŝipon, ĉar ili povus konduki al perforta kaj danĝera konfronto se la ŝipo rifuzas veni en Aŝdodon.

Se temus pri alia lando, la mondo kondamnus la planojn. Sed en tiu ĉi kazo temas pri Israelo. Libano tiel planas defii Israelon, sed nenio okazas. La mondo tute silentas. Sed atendu la tagon kiam Israelo haltigas la ŝipon. Mi vetas ke la mondo reagos tiun tagon! Oni rajtas defii kaj provoki Israelon, sed Israelo ne rajtas sin defendi… Tio estas la sama, ordinara kaj kutima ŝablono.

Tiu ĉi afiŝo estas publikigita en tri lokoj samtempe:
miajpripensadoj.wordpress.com, Esperanto.com kaj Ipernity.
Listo de ĉiuj artikoloj.

Ĉu en la Gaza-strio estas humana katastrofo??

21 Junio 2010

Ĉu en Gaza-strio estas humana katastrofo??

Respondo al la demando: NE!!

Tiuj ĉi bildoj estis publikigitaj en la retejo paltoday.ps en novembro 2009. Mi volas komuniki al ĉiuj legantoj: bonvolu ne kredu la mensogon ke en la Gaza-strio estus humana katastrofo!!

Fonto: Det er mat på Gaza-stripen (en la norvega)

Pri la laŭleĝeco aŭ kontraŭleĝeco de la Gaza-stria blokado

10 Junio 2010

La israela blokado de la Gaza-strio estas tre kritikata kaj estas vaste asertate ke la blokado estas kontraŭleĝa. Tamen laŭ validaj internaciaj leĝoj starigo de blokado estas tute laŭleĝe en situacio de armita konflikto. Israelo estas en armita konflikto kun teroristaj organizaĵoj agantaj en la Gaza-strio. Tiu ĉi konflikto daŭris dum multaj jaroj, sed intensiĝis en junio 2007 kiam Hamas perforte prenis la gvidadon de la Gaza-strio. Ekde tiam la Gaza-strio estas kvazaŭ bazo por pafadoj de raketoj kaj grenadoj en urbojn kaj vilaĝojn en la sudaj partoj de Israelo.

Konforme al la leĝoj de armitaj konfliktoj, lando kiel partio en armita konflikto rajtas starigi maran blokadon apud la bordo de la malamikoj pro sekurecaj kaŭzoj. Mara blokado signifas malhelpadon de la preterpaso (eniro kaj eliro) de ĉiuj akvoveturiloj al aŭ el ĉiuj havenoj kaj bordaj areoj de la malamikoj, sen konsidero de kia speco de ŝarĝo la akvoveturiloj transportas.

La rajto starigi maran blokadon estas bone konfirmita en tradicia internacia leĝo. Ĝi estas komuna kutimo kaj eĉ la regularo de la Unuiĝintaj Nacioj listigante la diversajn rimedojn eblajn por la Konsilio de Sekureco konservi aŭ restarigi internacian pacon kaj sekurecon, eksplicite mencias la maran blokadon inter tiuj rimedoj (Artikolo 42 de la Regularo).

Simile, Artikolo 7.7.1 de ”La Manlibro de Komandanto pri leĝo de Maraj Operacioj”, publikigita de la Usona militŝiparo en julio 2007 klarigas la jenon:

”Blokado estas milita operacio por antaŭmalhelpi akvoveturilojn kaj/aŭ aviadilojn de ĉiuj nacioj, tiel malamikajn kiel ankaŭ neŭtralajn, de enirado kaj elirado el specifitaj havenoj, flughavenoj, aŭ bordaj areoj apartenantaj al, okupataj de aŭ regataj de malamika nacio. Dum la milita rajto de inspektado kaj serĉado estas desegnita por malpermeso de alfluo de kontrabandaĵoj, la milita rajto de blokado intencas antaŭmalhelpi akvoveturilojn kaj aviadilojn, sen konsidero de ilia ŝarĝo, de transpasi starigitan kaj sciigitan kaj diskonigitan kordonon apartigantan la malamikojn de akvoj kaj/aŭ aerspaco”.

Internacia leĝo fiksas multajn kondiĉojn por laŭleĝa mara blokado (tiuj kondiĉoj estas konsiderataj ekzemple en la ”San Remo Manlibro de Internacia Leĝo aplikebla je Armita Konflikto Surmare” de 1994). Israelo tamen observas ĉiujn tiujn kondiĉojn. Ekzemple estas fiksita ke ”mara blokado estas starigita pro sekurecaj kaŭzoj. Sekve, la partio daŭriganta la blokadon devas zorgi pri pasado de homhelpa subteno por la civila loĝantaro de la areo blokadata. Tiu ĉi devo difinas la rajton de la blokadanta partio preskribi la teknikajn aranĝojn, inklude serĉadon, sub kiuj la pasado estas permesata, por certiĝi ke neniaj rimedoj estos transigitaj profite al la malamikoj, anstataŭ al la civila loĝantaro, kaj ke la homhelpa subteno estas distribuata sub la observado de neŭtrala partio kiu antaŭmalhelpas la misuzon de la homhelpa subteno fare de la malamiko”.

Israelo permesis pasadon de homhelpa subteno en la Gaza-strion longe antaŭ la starigo de la blokado. La subteno eniris en la Gaza-strion tra limpasejoj inter Israelo kaj la Gaza-strio, sub sekureca kontrolo kaj kunordige kun internaciaj organizaĵoj agantaj en la Gaza-strio.

Israelo do observas ĉiujn regulojn kaj kondiĉojn de starigo de mara blokado. Konklude la mara blokado starigita de Israelo en la Gaza-strio akordas al internacia leĝo. La blokado do estas tute kaj plene laŭleĝa.

Fonto: Interception of the Gaza flotilla-Legal aspects

Tiu ĉi afiŝo estas publikigita en tri lokoj samtempe:
miajpripensadoj.wordpress.com, Esperanto.com kaj Ipernity.
Listo de ĉiuj artikoloj.

La blokado de la Gaza-strio – aktuala afero

7 Junio 2010

La okazintaĵoj lige kun la ŝiparo klopodinta transporti provizaĵojn rekte en la Gaza-strion denove aktualigis la Israelan-Palestinan konflikton kaj precipe la blokadon de la Gaza-strio. La blokado de la Gaza-strio estas daŭre pridubata, kritikata kaj kondamnata, samkiel multaj aliaj aferoj koncernante Israelon, kaj la diskutoj ekflamiĝegis denove pro la lastatempaj okazintaĵoj. La ĉefa signalo kaj reago estas ke Israelo nepre kaj rapide nuligu la blokadon. Israelo tamen asertas ke la blokado de la Gaza-strio daŭros.

La amaskomunikiloj kutime donas tian bildon de la situacio en la Gaza-strio ke la blokado kaŭzas severajn cirkonstancojn al la tie loĝantaj civiluloj. Oni raportas pri manko de provizaĵoj, manĝo, elektro kaj fuelo. Oni ankaŭ raportas ke Israelo ne permesas la palestinanojn lasi la teritorion kaj ke tio kaŭzas suferadon kaj eĉ mortojn ĉar la malsanuloj tiel ne povas havigi hospitalan flegadon ekster la Gaza-strio.

Tamen esplorante la situacion pli profunde, oni povas konstati ke la situacio ne estas tia, kia la amaskomunikiloj ĝin priskribas. Israelo daŭre funkciigas homhelpan koridoron, tra kiu helporganizoj povas transporti provizaĵojn en la Gaza-strion. Dum la lastaj 18 monatoj pli ol 1 miliono da tunoj de provizaĵoj estis transportitaj en la Gaza-strion, kio egalas al preskaŭ po 1 tuno por ĉiu loĝanto. Pli ol 70 % de la elektra provizo de la Gaza-strio devenas el Israelo kaj la cetero estas produktata en Gaza kaj importata el Egipto. Do oni povas konstati ke ne ekzistas humana katastrofo en la Gaza-strio, kvankam la amaskomunikiloj preskaŭ tute kaj plene asertas la kontraŭon.

Estas grave atenti ke la blokado de la Gaza-strio ne celas la civilulojn de la Gaza-strio, sed la teroristan organizon Hamas, kiu agas en la Gaza-strio. Se tiu terorista organizo ne estus aganta en la teritorio, la blokado estus nenecesa. La blokado tamen estas necesa por malhelpi la agadojn de la teroristoj, ĉar ili aktive celas daŭrigi la teroristajn agadojn kaj ĉiusemajne novaj raketatakoj estas efektivigitaj. La terorista agado en la Gaza-strio estas severa minaco por Israelo kaj kaŭzas mortojn, detruon kaj mensan suferon.

Ekde la jaro 2000 ĝis la jaro 2008 ĉirkaŭ 12 000 raketoj kaj grenadoj estis pafataj en Israelon, inklude ĉirkaŭ 3000 nur dum la jaro 2008. Pro la vigla raket- kaj grenadpluvo el la Gaza-strio Israelo devis defendi sin kontraŭ tiuj kreskantaj kruelaĵoj dum la vintro 2008-2009. Tiu defenda operacio tamen estis tre kritikata kaj pridubata, kiel kutimas koncernante aferojn rilate al Israelo kaj ties agadoj kaj elektoj. La operacio tamen estis efika, ĉar poste la nombro de la atakoj malkreskis, sed ili ne tute ĉesis kaj bedaŭrinde ili daŭras ankoraŭ hodiaŭ ĉar raketatakoj okazas ĉiusemajne.

Estas grave atenti ke tiaj teroristaj agadoj celas ordinarajn civilulojn; virojn, virinojn kaj infanojn. La armeo de ĉiu ajn suverena lando havas la rajton – kaj la devon – defendi siajn civitanojn kontraŭ tiaspecaj atakoj – kaj tio koncernas ankaŭ Israelon. Tamen rilate Israelon ŝajnas ke oni ĉiufoje kondamnas la defendajn operaciojn de la israela armeo, sed preskaŭ neniam sufiĉe klare la verajn kaŭzojn de la defendoneceso, nome la teroristajn agadojn. Komence Israelo ankaŭ ĉiufoje celas solvi la minacojn senmilite, sed plejlaste devas sole sin defendi milite se la aliaj klopodoj ne donas kontentan rezulton. Oni atentu ke Israelo dum sia historio neniam komencis militon, ĉar la lando en ĉiuj militaj kazoj ĝis hodiaŭ nur sin defendis kontraŭ ekstera minaco. Koncerne la defendan operacion dum la vintro 2008-2009 Israelo klopodis solvi la problemojn pere de la Unuiĝintaj Nacioj, sed la engaĝo de tiu ĉi organizo estis malbonega kaj Israelo devis sin defendi sole sen helpo. Kiel jam menciite la operacio kaŭzis multe da kritiko kaj pridubadoj. Oni atentu ke tiu ĉi milita operacio ne celis la civilulojn de la Gaza-strio, sed la teroristan organizon Hamas kaj ties batalantojn. Estas tre absurde ke la mondo preskaŭ nenion diris pri la miloj da raketoj kaj grenadoj pafataj en Israelon, sed ja malmolvorte kondamnis Israelon, kiam la lando fine per forta, sed necesa milita operacio devis detrui la infrastrukturon de la teroristoj.

Lundon la 31-an de majo ĉi-jare ŝiparo konsistante el 6 ŝipoj alproksimiĝis al la Gaza-strio. La ŝipoj estis ŝarĝitaj de helpaĵoj kaj provizâjoj por la civiluloj de la Gaza-strio, kvankam poste oni inter la ŝarĝo trovis kelkajn âjojn kiuj verŝajne estis destinitaj por teroristaj agadoj. La celo de la ŝiparo ankaŭ estis nuligi la blokadon de la Gaza-strio.

Israelo frue signalis al la organizantoj ke apud la Gaza-strio estas mara blokado kaj ke la ŝiparon oni ne tial permesos albordiĝi al la Gaza-strio. Oni atentu ke en la Israela-Palestina interkonsento de la jaro 1995 klare estas decidita ke ajnaj ŝipoj ne estas permesitaj alproksimiĝi al la Gaza-strio je pli ol 12 marmejloj. Israelo ankaŭ klopodis solvi la situacion ekzemple kun la Turka registaro, tamen sen rezultoj. Oni proponis ke la ŝiparo povus alveni en la havenon de Aŝdod, de kie la ŝarĝo, post inspektoj, laŭvoje estus transportita en la Gaza-strion.

Do, lundon la 31-an de majo la ŝiparo estis alproksimiĝanta al la bordo de la Gaza-strio. La soldatoj sur la militŝipoj de la israela armeo multfoje avertis la anojn de la alproksimiĝanta ŝiparo kaj klarigis pri la cirkonstancoj koncerne la maleblecojn albordiĝi al la Gaza-strio. Oni denove proponis pri la ebleco direkti la ŝipojn en la havenon de Aŝdod de kie la ŝarĝo post inspektoj estus transportita al sia destino. Tiuj avertoj kaj proponoj tamen estis tute ignoritaj de la ŝiparanoj. Kiel lasta solvo la soldatoj devis surferdekiĝi por haltigi la ŝipojn kaj akompani ilin al la Aŝdoda haveno de kie la ŝarĝo estis transportita laŭvoje en la Gaza-strion. Surferdekiĝinte la israelaj soldatoj tamen frontis severan kaj agreseman perforton sur unu ŝipo. La profesiaj israelaj soldatoj evitis mortigan defendon kiel eble plej longe, sed estis pro la persista perforto de la kontraŭbatalantoj devigataj pafmortigi 9 el ili memdefende.

La reagoj de la mondo estis fortaj kaj rapidaj; estroj ĉirkaŭ la mondo esprimis siajn skuiĝojn pro la okazintaĵoj kaj rapide kaj malmolvorte kondamnis kaj kritikis la israelan “atakon”. La Konsilio de Sekureco de Unuiĝintaj Nacioj kunvenis, samkiel NATO. En multaj urboj estis kontraŭ-israelaj manifestacioj aranĝitaj.

La reagoj de la mondo pro la okazintaĵoj estas multaspekte absurdaj, samkiel koncernante la israelan operacion dum la vintro 2008-2009. Kompreneble oni ĉiam povas pridubi la israelajn agadojn, sed havante ĉiujn faktojn sur la tablo estas pli facile kompreni kial Israelo agadas tiel. Estas kompreneble tragike ke 9 homoj mortis, sed tio ankaŭ estas pli facile kompreni, se oni vidas la tuton. Iuj el la ŝipanoj de la ŝipo sur kiu la soldatoj frontis perforton, klare preparis la perfortadon antaŭe, ĉar sur la ŝipo estis trovitaj iloj por tia agado. Dum la sinsekvo la batalantoj ankaŭ kaptis pafilojn de la soldatoj, kaj intencis pafi al la soldatoj. Estante en tiu granda danĝero la soldatoj estis devigataj sin defendi pafmortigante 9 el la batalantoj.

Estas tre interese vidi kiel la situacio evoluos dum la venontaj semajnoj. Ŝajnas ke la plejparto de la mondo ne komprenas ke Israelo ne povas nuligi la blokadon de la Gaza-strio – tamen oni admonas Israelon fari tiel. La asertoj ke la palestinanoj suferus altgrade pro la blokado estas grandega troigo, kvankam la palestinanoj kompreneble iagrade suferas pro la blokado – sed nepre ne tiel kiel oni asertas en multaj amaskomunikiloj. Kompreneble estus multe pli bone por ĉiuj se ne ekzistus teroristaj agadoj en la Gaza-strio kaj tiel ankaŭ nenia blokado, sed ŝajnas ke tio ne en la plej proksima tempo okazos. La vero estas ke tiel longe kiel Hamas sin okupas pri teroro en la Gaza-strio, tiel longe tie daŭros la blokado. Do la vera problemo estas terorismo, ne la blokado. La mondo do kondamnu la terorismon anstataŭ Israelon defendantan sin kontraŭ tio – en tiu kazo per blokado. Kaj la mondo kontraŭluktu la terorismon, ne la blokadon; la blokado de la Gaza-strio ja estas kaŭzita pro la ekzisto de terorismo en tiu sama teritorio. La problemon oni ne solvas per nuligo de la blokado – tiel oni nur pligrandigus la problemojn, sed ŝajnas ke la blokado iĝis la reala problemo, kvankam la origina problemo estas la terorismo. La blokadon oni ja povas nuligi, sed unue oni devas sufoki la teroristajn agadojn, kiuj estas la kaŭzo de la blokado.

La judoj ĉie kaj ĉiam estis persekutataj kaj mistraktataj dum la historio. En la jaro 1948 ili ricevis propran landon kaj moviĝis tien grandaskale, sed bedaŭrinde ili ne êc tie estas lasitaj vivi en paco kaj harmonio. Israelo estas agnoskita lando kaj egala membro en la monda familio de landoj. Nenio rajtigas la daŭran minacon kaj teroradon kontraŭ tiu ĉi lando. Israelo havas la rajton sin defendi – en sama maniero kiel ĉiuj aliaj landoj sur nia planedo. Flanke de la israelanoj ankaŭ la palestinanoj suferas, sed tio ne dependas de la blokado israela, sed de la samaj kaŭzoj pro kiuj la israelanoj suferas; la terura kaj besteca terorisma agado de Hamas. Tial la solvoj de la konflikto ne estas kondamni Israelon, nek nuligi la blokadon de la Gaza-strio. La solvo de la konflikto estas kontraŭlukti la teruran kaj bestecan terorismon, sed ŝajnas ke la mondo tion ne komprenas… Kaj dume Israelo daŭrigos la blokadon, ĉar la daŭrigo de la blokado estas la nura alternativo – ĝis Hamas ne plu minacas. Ŝajnas ke Israelo estas tre sola en tiu ĉi situacio, sed fakte Israelo estis tre sola dum sia tuta historio. Tamen tiu ĉi malgranda lando ekzistas hodiaŭ, kvankam ĝi frue dum sia historio frontis multajn severajn minacojn, sed tre bone forsavis sin de tiuj – tute sole. Kaj tion tiu ĉi malgranda kaj minacata lando devas fari ankaŭ en tiu ĉi situacio. Ĉar aliaj alternativoj ne ekzistas.

Kiel fontoj estis uzitaj komunikaĵoj en la retpaĝo de la Israela Ministerio pri Eksterlandaj Aferoj: http://www.mfa.gov.il.

Tiu ĉi afiŝo estas publikigita en tri lokoj samtempe:
miajpripensadoj.wordpress.com, Esperanto.com kaj Ipernity.
Listo de ĉiuj artikoloj.